Ümummilli lider Heydər Əliyevin 100 illik yubileyi çərçivəsində keçirilən Musiqi Forumunun birinci günündə baş tutan I panel iclası "Azərbaycanda musiqi təhsili - bəstəkarlıq və ifaçılıq məktəbləri" adlanırdı. Paneldə "Ölkədəki musiqi təhsil sisteminin nailiyyətləri və çətinlikləri", "Ali musiqi təhsili: yeni peşə yönümləri və ixtisaslaşmalar tələbi qarşısında", "Bəstəkar musiqisinin ifaçılıq problemləri: aktual problemlər və onların həlli yolları", "Musiqi repertuarının zənginləşdirilməsi və bəstəkarlara dövlət sifarişləri" və "Azərbaycanda bəstəkar musiqisinin nəşri, səs yazısı və yayımlanma problemləri" bu mövzular müzakirə olundu.
Panelin moderatoru bəstəkar, "Cadenza" kamera orkestrinin bədii rəhbəri Türkər Qasımzadə Üzeyir bəyin "Biz necə iş görürük?" lətifə-felyetonunu xatırlatmaqla sözə başladı. O, kiçik məqamlara diqqət yetirmədən böyük problemlərin həllinin mümkün olmadığını vurğuladı. Sonra söz musiqişünas, Azərbaycan Dövlət Mədəniyyət və İncəsənət Universitetinin rektoru professor Ceyran Mahmudovaya verildi. Rektor orta məktəb proqramında musiqi təhsilinin səviyyəsinə toxunaraq məktəblilərin xor məşğələlərinə cəlb edilməsinin vacibliyini belə əsaslandırdı ki, xor istedadından asılı olmayaraq hər kəs üçün əlçatan musiqi məşğuliyyətidir.
Növbəti spiker - musiqişünas, Əməkdar müəllim, Bakı şəhər Fikrət Əmirov adına 6 nömrəli onbirillik Musiqi məktəbinin direktoru Adilə Yusifova musiqi məktəblərində türk xalqlarının musiqi tarixinin öyrənilməsinin vacibliyini nəzərə çatdırdı.
Bəstəkar, Üzeyir Hacıbəylinin Ev-Muzeyinin direktoru, Xalq artisti Sərdar Fərəcov Üzeyir bəyin milli musiqiçi kadrların yetişdirilməsi gördüyü işləri yada saldı.
Elm və Təhsil Nazirliyi Elm sektorunun müdiri Turxan Süleyman isə öz çıxışında orta ixtisas və ali musiqi təhsili, mütəxəssis hazırlığının meyarları barədə məlumat verdi.
Azərbaycan Dövlət Akademik Opera və Balet Teatrının baş dirijoru Əməkdar artist Əyyub Quliyev yeni səhnə əsərlərinin dövlət tərəfindən alınması, əsərlərin not yazılarının bərpası və yenidən nəşri probleminə toxundu.
Birinci paneldə son çıxış edən bəstəkar -pedaqoq Tahir İbişov musiqi məktəblərində təhsil sisteminin yenilənməsi, orta məktəblərdə musiqi fənninə dırnaqarası münasibətin bəzi hallarda hələ də davam etməsindən narahatlığını dilə gətirdi.
Sonra paneldə qaldırılmış mövzular ətrafında müzakirələr aparıldı.
Müzakirələrdə klassik mahnı nümunələrinin geniş təbliğinə ehtiyac olduğu vurğulandı. Həmçinin yeni musiqi əsərlərinin dövlət tərəfindən alınması ənənələrinin bərpası təklifi və s. problemlər gündəmə gətirildi.