Qobustan Milli Tarix-Bədii Qoruğunun direktoru Vüqar İsayevin başçılıq etdiyi nümayəndə heyəti Türkiyə Respublikasında işgüzar səfərdədir. Səfər çərçivəsində nümayəndə heyəti Qobustan abidələrinin beynəlxalq müstəvidə təbliği məqsədilə 3-5 may 2023-cü il tarixlərində İstanbul şəhərində keçiriləcək "Heritage İstanbul" beynəlxalq "Qoruma, bərpa, arxeologiya, muzeyşünaslıq və texnologiyalar" sərgisində Qobustan Milli Tarix-Bədii Qoruğunun iştirakını təmin etmək üçün sərginin keçiriləcəyi ekspo mərkəzinin rəhbər heyəti ilə görüş keçirib. Görüş zamanı Qobustan Milli Tarix-Bədii Qoruğunun sərgidə iştirakı barədə razılıq əldə edilib, qarşlıqlı münasibətlər mövzusunda müzakirələr aparılıb, Qobustan abidələri üçün təqdimat məkanı müəyyən olunub.
Qeyd edək ki, mədəni irs nümunlərinin təbliğinə, qorunmasına xidmət edən, bu məqsədlə müxtəlif məhsul, xidmət və texnologiyaların yaradılmasını və inkişafını hədəf seçən sərgi Türkiyə Respublikasının Mədəniyyət və Turizm Nazirliyi tərəfindən təşkil olunur. Məlumat üçün bildirək ki, keçiriləcək növbəti "Heritage İstanbul" beynəlxalq "Qoruma, bərpa, arxeologiya, muzeyşünaslıq və texnologiyalar" sərgisində 15-ə yaxın ölkənin təşkilat, şirkət və qurumlarının iştirakı gözlənilir.
Sərgiyə 10 mindən artıq ziyarətçinin gələcəyi proqnozlaşdırılır.