Dekabrın 21-də Beynəlxalq Muğam Mərkəzində Xalq artisti, klassik estrada musiqimizin parlaq nümayəndələrindən biri olan Sərxan Sərxan konsert proqramı ilə çıxış etdi.
İlk olaraq BMM-nin direktoru, Xalq artisti Murad Hüseynov səhnəyə çıxaraq tamaşaçıları salamladı. Sərxan Sərxanı klassik estrada sənətimizin canlı korifeyi adlandıran direktor muğənninin növbəti konsertinin BMM səhnəsində baş tutmasından məmnunluğunu ifadə etdi. Sənətkara can sağlığı, uğur arzulayaraq onu səhnəyə dəvət etdi.
Gecədə müğənni sevilən lirik kompozisiyaları ilə yanaşı repertuarındakı retro və müəllif, dillər əzbəri olan mahnıları ilə tamaşaçıların qarşısına çıxdı.
Böyük alqışlarla qarşılanan müğənni ilk olaraq “Salam, Bakı şəhərim “ ifası ilə tamaşaçıları salamladı. Xalq şairiləri N.Xəzrinin şeirinə “Nə dedim", N.Həsənzadənin sözlərinə “Kinoda” və Əməkdar incəsənət xadimi, şair T.Bayramın sözlərinə bəstələdiyi “Ay gecikən məhəbbətim” mahnıları isə tamaşaçılara xüsusi ovqat bəxş etdi. Solo və illərdir ona dost olan gitarası ilə birgə səhnədən tamaşaçılarla səmimi ünsiyyət quran Xalq artisti hər bir ifası və mahnısı haqqında məlumat verərək, həm də öz təəssüratlarını bölüşdü.
Anşlaqla keçən konsert tamaşaçıların gur alqışları ilə yekunlaşdı. Qeyd edək ki, konsert ifaçının 3 illik fasilədən sonra böyüyüb boya-başa çatdığı Bakıda ilk konserti idi.
