Aprelin 22-də Nizami Kino Mərkəzində Mədəniyyət və Turizm Nazirliyinin təşkilati dəstəyi ilə keçirilən ilk Buktreyler Festivalının nəticələri açıqlandı.
Buktreyler Festivalının keçirilməsində əsas məqsəd kitab və mütaliənin cəmiyyətimizdə təbliği, mütaliəyə münasibətin yaradıcı formaların inkişafı və dəstəklənməsi, kino sahəsində istedadlı və yaradıcı gənclərin (rejissor, operator, rəssam, aktyor, qrimçi və s.) üzə çıxarılması, buktreylerlərin incəsənət və biznesdə bir istiqamət kimi inkişafıdır.
Qaliblərin təqdimetmə mərasimində çıxış edən festivalın təsisçisi, kinoaktyor Ruslan Sabirli bildirdi ki, cəmiyyət üçün faydalı olan festival çox böyük maraqla qarşılandı. Festivala təqdim edilən işlərdən 21-i qəbul olunub və münsiflər heyəti tərəfindən qiymətləndirilib.
Tədbirdə çıxış edən mədəniyyət və turizm nazirinin birinci müavini Vaqif Əliyev ölkəmizdə kitaba, mütaliəyə marağın artırılması üçün həyata keçirilən layihələrdən danışdı. Son illər ölkəmizdə bu sahədə böyük işlərin görüldüyünü qeyd edərək, kitabxanaların yeni kitablarla təmin olunduğu, iş şəraitinin yaxşılaşdırıldığı, elektron kitabxana sisteminin yaradıldığını vurğuladı. Buktreyler festivalının keçirilməsindən danışaraq bildirdi ki, kinoaktyor Ruslan Sabirli tərəfindən irəli sürülən bu təşəbbüs böyük marağa səbəb olub. Belə təşəbbüslərin nazirlik tərəfindən daim dəstəkləndiyini söyləyən Vaqif Əliyev qeyd etdi ki, layihə gənclərdə kitaba marağın artmasına imkan verir. Layihəni yüksək qiymətləndirən nazir müavini vurğuladı ki, videoçarx vasitəsilə kitabın məzmunun qısa şəkildə tamaşaçıya çatdırmaq özü bir istedaddır.
Daha sonra qaliblərin adları açıqlandı. Birinci yerə Ercan Akarsunun "İkimizin melodiyası" əsəri ilə Elçin Quliyev, ikinci yerlərə Nik Vuyçiçin "Hüdudsuz" kitabı ilə Natiq Axundov və Sayalı Baharın "Aztagrambook" kitabı ilə Fərid Rəsulov layiq görüldü.
Üçüncü yerlərə isə Vüsal Nurunun "Prezidentin qızı" əsər ilə Asif Əliyev, Varis Yolçuyevin "Əzilmiş fotoşəkillər" kitabı ilə Elmin Əliyev və Orxan Fikrətoğlunun "Ölü mətn" kitabı ilə Elçin Elxanlı qalib elan edildi. Birinci, ikinci və üçüncü yerlərin sahibləri müvafiq olaraq 1000, 800 və 500 manat pul mükafatı və diplomla təltif edilidi. Mark Levinin "Ruhuna vuruldum" kitabına çəkilmiş buktreylerə isə Səbinə Quliyevaya tamaşaçı simpatiyasına görə diplom təqdim edildi.
Qeyd edək ki, qaliblər Xalq Yazıçısı Çingiz Abdullayev, ssenarist, rejissor, Əməkdar İncəsənət Xadimi Ramiz Fətəliyev, kinorejissor Elxan Cəfərov, rejissor, klipmeyker Ülviyyə Könül, kinooperator Nadir Mehdiyev, festivalın təsisçisi, kinoaktyor Ruslan Sabirlidən ibarət münsiflər heyəti tərəfindən seçilib. Festivalın obyektiv keçirilməsi məqsədilə buktreylerlər hər bir münsif üzvü tərəfindən ayrılıqda qiymətləndirilib. Sonda isə yekun olaraq təşkilat komitəsi hər bir münsifin verdiyi qiyməti toplamaqla qalibləri müəyyənləşdirib.