Qənirə Paşayevanın “Tarixə adını yazan qadınlar” üçcildliyinin imza mərasimi keçirildi

Oktyabrın 5-də  Bakı Ekspo Mərkəzində keçirilən VIII Bakı Beynəlxalq Kitab Sərgisində Millət vəkili, Milli Məclisin Mədəniyyət Komitəsinin sədri Qənirə Paşayevanın  “Tarixə adını yazan qadınlar”  üçcildliyinin imza mərasimi keçirildi. Tədbirə giriş sözü ilə başlayan Qənirə Paşayeva ilk öncə qonaqları salamladı, sonra  kitabın dəyəri, məziyyətləri haqqında qənaətlərini səsləndirdi: “Kitab bir vərdişdir. Bu vərdiş çox kiçik yaşlarında uşaqlara aşılanmalıdır. Ona görə mən bütün ailələrə buradan bir çağırış edirəm. Müxtəlif ölkələrdən nəşriyyatlar burada öz kitabları ilə təmsil olunur. Bu çox böyük bir hadisədir ki, siz bura gəlib fərqli mədəniyyətlərin, ölkələrin təmsil ounduğu kitablarla tanış olursunuz. Siz övladlarınızı bura gətirsəniz, bu tədbir uşaqların yaddaşında silinməz izlər qoyacaq. Çünki aldığı hər kitab, o kitabların müəllifi ilə olan görüşlər uşaqların hafizəsində silinməz izlər buraxır. Bir qıza veriləcək ən yaxçı cehiz kitab, təhsil və oxumaqdır”.

 Daha sonra “Tarixə adını yazan qadınlar”  üçcildliyinin önəmli məqamlarına toxunan Qənirə Paşayeva bildirdi ki, bu kitab dünya ölkələrindəki qadınlarla yanaşı, Azərbaycan tarixində özünəməxsus imzasını qoyan qadınlardan bəhs edir.  Azərbaycanın ilk qadın hökmdarı Tomris, ilk qadın diplomat Sara Xatun, hamımıza öz zərifliyi, uzaqgörənliyi ilə  örnək olan birinci xanım Mehriban  Əliyevadan və tariximizdə, mədəniyyətimizdə öz sözünü deyən digər xanımlardan bəhs edir. Qənirə Paşayeva çıxışında bildirdi ki, bu kitab onu mütaliə edən hər kəsə yüksək motivasiya aşılayır. “Mən hər şeyi bacaracam” devizi kitabın əsas ideyasıdır ki, insana əzm, iradə və yüksək həyat eşqi bəxş edir. 

Təqdimatın sonunda müəllif ilə imza saatı keçirildi.