Heydər Əliyev Fondu, Mədəniyyət Nazirliyi və Şuşa Şəhəri Dövlət Qoruğu tərəfindən Şuşada təşkil olunan V “Xarıbülbül” Beynəlxalq Folklor Festivalı davam edir.
Mayın 13-də Üzeyir Hacıbəylinin heykəlinin qarşısındakı kiçik səhnədə festivalın ikinci gününün yekun konserti keçirildi.
Konsertdə “Pakistan rəngləri” (“Colors of Pakistan”) qrupu və Özbəkistanın “Bahar” Dövlət Rəqs Ansamblının çıxışları təqdim olundu.
Konserti izləyən tamaşaçılar arasında Prezident Administrasiyası Humanitar siyasət, diaspor, multikulturalizm və dini məsələlər şöbəsinin müdiri Fərəh Əliyeva, mədəniyyət naziri Anar Kərimov, Azərbaycanın Rusiyadakı səfiri, Xalq artisti Polad Bülbüloğlu, tanınmış mədəniyyət və incəsənət xadimləri vardı.
Proqramda çıxışçılar Pakistan təmsilçiləri tərəfindən “Sind”, “Balochistan”, “Pashtun KPK”, “Gilgit”, “Punjab”, “Bayot” rəqsilərini təqdim etdi. “Bahar” ansamblı isə özbək ənənəvi musiqisi, “Katta oyin”, “Kongil taroniyası”, “Pilla”, “Ləzgi” Xarəzm, “Larzon” buxara, və “Fərqanənin rübaisi” rəqslərini ifa etdi.
Bütün çıxışlar gur alqışlarla qarşılandı.
Qeyd edək ki, “Colors of Pakistan” qrupu əsasən ölkənin Pəncab, Sindh, Puştun, Bəlucistan və Gilgit daxil olmaqla müxtəlif bölgələrinin xalq rəqslərini yüksək professionallıqla təqdim edir. Beş çayın vətəni olan Pəncab cəsur, qonaqpərvər xalqı, coşqun bayramları və şənlikləri ilə tanınır. Sindh sülh, sevgi, romantika, böyük mədəni və bədii dəyərlərin vətənidir. Puştun şimal-qərbi Pakistan torpaqlarıdır. Puştun mədəniyyəti qədim həyat tərzi olan Paştunvaliyə əsaslanır. Bəluçistan da özünəxas bayramları ilə məşhurdur. Gilgit isə çoxşaxəli mədəniyyətə, etnik qruplara ev sahibliyi edir. Mədəniyyətlərin bu çoxluğu Gilgitin strateji yerləşməsi ilə əlaqədardır. Ənənəvi “Gilgit” rəqsi “Hareep” kimi də tanınır.
Özbəkistanın “Bahar” Dövlət Rəqs Ansamblı 1957-ci ildə yaradılıb. Qurucusu, bədii rəhbəri və baş xoreoqrafı SSRİ Xalq artisti Mükərrəm Turğunbayeva olub, hazırda onun adını daşıyır. Ansamblın bədii rəhbəri və baş xoreoqrafı Özbəkistanın Əməkdar artisti, Qaraqalpaqıstanın Xalq artisti Ziyoda Mədrəximovadır. Musiqi rəhbəri Özbəkistanın Əməkdar artisti Məhəmmədcan Şakirovdur. Ansamblın repertuarında 200-dən çox rəqs var. “Bahar” ansamblının repertuarı müasir özbək rəqsinin nailiyyətləri ilə özbək xalqının çoxəsrlik ənənəvi rəqs mədəniyyətini birləşdirir. Kollektiv tarixi, etnoqrafik və müasir xalq rəqsləri əsasında yeni məzmunlu səhnə rəqsləri yaradıb.
Xatırladaq ki, festivalda 10 xarici ölkədən müxtəlif folklor üslubları üzrə musiqiçilər, rəqs kollektivləri, həmçinin Azərbaycanın müxtəlif regionlarından folklor kollektivləri iştirak edir. V “Xarıbülbül” Beynəlxalq Folklor Festivalı mayın 14-də başa çatacaq.
