İstedadlı gənclərə Azərbaycan Respublikası Prezidentinin himayəsini, onların yaradıcılıq potensialını inkişaf etdirmək üçün dövlət qayğısını təmin etmək məqsədilə Prezident Heydər Əliyev “Azərbaycanda gənc istedadlara dövlət qayğısı haqqında” 1996-cı il 22 iyun tarixində fərman imzalayıb. Bu fərmana uyğun olaraq Azərbaycan Respublikası Prezidentinin müvafiq sərəncamları ilə incəsənət sahəsində xüsusi istedadı olan gənclərin adı “Azərbaycanın gənc istedadlarının “Qızıl kitabı”na yazılır və onlar Prezidentin xüsusi aylıq təqaüdünə layiq görülürlər. Habelə Azərbaycan Respublikası Prezidentinin 2013-cü il 2 iyul tarixli fərmanı ilə “Gənclər üçün Prezident mükafatı” təsis edilib. Mükafat hər il müxtəlif sahələrdə, o cümlədən incəsənət sahəsində xüsusi fərqlənən gənclərə verilir.
Vətənpərvər, savadlı və istedadlı bu gənclər Azərbaycan Respublikasının Prezidenti, Silahlı Qüvvələrin müzəffər Ali Baş Komandanı cənab İlham Əliyevin 60 illik yubileyinə töhfə olaraq konsert proqramı ilə çıxış etmək təşəbbüsünü irəli sürmüşdülər.
Dekabrın 24-də, möhtərəm Prezidentimizin 60 illik yubiley günündə, M.Maqomayev adına Azərbaycan Dövlət Akademik Filarmoniyasında konsert keçirildi.
Konserti izləyən tamaşaçılar arasında mədəniyyət naziri Anar Kərimov, nazir müavini Sevda Məmmədəliyeva, Bakı Şəhər Mədəniyyət Baş İdarəsinin rəisi Cəlil Məlikov və musiqi məktəblərinin direktorları da var idi.
Zəngin repertuarlı konsertdə Prezident təqaüdçüsü, Gənclər üçün Prezident mükafatçısı Mustafa Mehmandarovun dirijorluğu ilə Bakı Şəhər Mədəniyyət Baş İdarəsinin Bakı Kamera Orkestri (baş dirijor və bədi rəhbər - Əməkdar artist Fuad İbrahimov) , Gənclər üçün Prezident mükafatçısı Atəş Qarayev (vokal), Prezident təqaüdçüləri Cəmil Sədizadə və Vüsalə Babayeva, (fortepiano), Zərrin Əliyeva (violin), Orxan Hüseynov (violonçel), Nicat Məmmədov (fleyta), Atabəy İsmayılov (tar), Nihad Orucov (vokal), Bakı şəhər R.Hacıyev adına 15 nömrəli Onbirillik Musiqi Məktəbinin şagirdi Əbdüləli Hüseynli (fortepiano), C.Qaryağdıoğlu adına 9 nömrəli Uşaq Musiqi Məktəbinin nağaraçılar ansamblı, L. və M.Rostropoviçlər adına 21 nömrəli Onbirillik Musiqi Məktəbinin nəfəsli alətlər ansamblı, Abşeron rayon Xırdalan şəhər Onbirillik Musiqi Məktəbinin şagirdi Sabir Ağayev (xanəndə) çıxış etdilər.
Konsert proqramında Üzeyir Hacıbəyli, Qara Qarayev, Fikrət Əmirov, Tofiq Quliyev, Cahangir Cahangirov, Müslüm Maqomayev, Aqşin Əlizadə və digər bəstəkarların əsərləri səsləndirildi.
A.Əlizadənin Azərbaycan xalqının qəhrəmanlıq tarixinin səhifələrini canlandıran, Vətənin füsunkar təbiətini vəsf edən “Cəngi” əsəri ilə başlanan konsert proqramı zala sanki bir mübarizlik ruhu bəxş etdi. Bəstəkar Ə.Əliyevin “Vətən marşı”, C.Cahangirovun “Qarabağ”, T.Quliyevin “Qaytağı”sı konsert boyu Azərbaycan bəstəkarlıq məktəbinin zənginliyi və gənc istedadların sənətə sevgisini ortaya qoydu. Çıxışlar tamaşaçılar tərəfindən alqışlarla qarşılandı. M.Maqomayevin “Azərbaycan” mahnısı ilə tamamlanan konsert gənclərin Vətənə və sənətə sevgisinin mesajı idi.