Aprelin 20-də Nizami Kino Mərkəzində “Avtoportret” sənədli filminin təqdimatı keçirildi. Mədəniyyət və Turizm Nazirliyinin sifarişi ilə “Dublyaj” studiyasında istehsal olunan ekran əsəri görkəmli rəssam, Əməkdar incəsənət xadimi Əyyub Hüseynovun (1916-1998) həyat və yaradıcılıq yoluna həsr edilib.
Mərasimdə çıxış edən mədəniyyət və turizm nazirinin müavini vəzifəsini icra edən Ədalət Vəliyev XX əsr Azərbaycan rəssamlığının inkişafında böyük xidmətləri olan rəssamın həyat və yaradıcılığı haqqında ətraflı söz açdı. Bildirdi ki, şərəfli ömür yolu keçən fırça ustası Ə.Əzimzadə adına Azərbaycan Dövlət Rəssamlıq Məktəbində dərs deyib və 1956-1965-ci illərdə təhsil ocağının direktoru işləyib. Bu təhsil ocağında təkcə ölkəmizdə deyil, dünyaca məşhur rəssamlarımızın bir çoxu Əyyub müəllimdən də dərs alıb. Sənətkarın 90 və 100 illik yubileyləri nazirlik tərəfindən qeyd olunub, fərdi sərgiləri təşkil edilib.
Filmin əhəmiyyətindən danışan Ədalət Vəliyev qeyd etdi ki, sənət adamlarının həyat yoluna həsr edilən ekran əsərləri yaradıcı şəxsiyyətlərin xatirəsinə ehtiramla yanaşı, dövlətin mədəniyyətimizə diqqətinin göstəricisidir. Belə filmlər gələcək nəsil üçün bir tarixdir. Vurğulandı ki, Ə.Hüseynovun sənəti tələbələrinin, ən başlıcası isə iki oğlunun örnəyində davam etdirilir.
Rəssamlar İttifaqının sədri, Xalq rəssamı Fərhad Xəlilov Ə.Hüseynovun müəllim kimi gözəl keyfiyyətlərindən bəhs etdi. Bildirdi ki, o, həmkarlarının və tələbələrinin yaddaşında xoş xatirələrlə, yaradıcılıq uğurları ilə qalıb. Əyyub müəllim sənətkarlıqdan öncə səmimi insan, təvazökar ziyalı idi.
Azərbaycan Dövlət Rəssamlıq Akademiyasının prorektoru, Xalq rəssamı Fuad Salayev də Ə.Hüseynovun müəllim kimi gözəl keyfiyyətlərindən və yaradıcılığından bəhs etdi. Bildirdi ki, fırça ustası müxtəlif janrlarda əsərlər yaratsa da, ömrünün sonunadək realizm üslubuna sadiq qalıb, onun bütün imkanlarından istifadə edərək həyat gerçəklərini uğurlu sənət əsərlərinə çevirə bilib.
Sonra filmin yaradıcı heyəti səhnəyə dəvət olundu. Filmin ssenari müəllifi və rejissoru, Əməkdar incəsənət xadimi Yavər Rzayev çıxış edərək ekran əsəri üzərində işlədiyi zaman rəssamın həyatı ilə bağlı qarşılaşdığı maraqlı faktları tədbir iştirakçıları ilə bölüşdü.
Rəssamın oğlu İsmayıllı Regional Mədəniyyət və Turizm İdarəsinin müdiri Elnur Hüseynov çıxış edərək dövlətimizin mədəniyyət sahəsinə, o cümlədən rəssamlığa göstərdiyi diqqət və qayğıdan söz açdı. Filmin çəkilişinə görə Mədəniyyət və Turizm Nazirliyinə təşəkkürünü bildirdi. Atasının sənətinə, şəxsiyyətinə dövlət tərəfindən verilən qiymətə, onun irsinin qorunmasına göstərilən qayğıya görə minnətdarlığını ifadə etdi.
Çıxışlardan sonra “Avtoportret” sənədli filmi təqdim edildi. Filmin operatoru Rövşən Quliyev, prodüseri Qafar Məcidovdur.
